Центарот за младински активизам КРИК објавува повик за ангажирање консултант/ка за подготовка на практична инклузивна програма за младински центри и младински работници, во рамки на проектот „Младински центри за сите“.

Програмата ќе биде развиена врз основа на наодите од мапирањето на потребите на младинските центри и лицата со попреченост, со цел да понуди конкретни насоки, алатки и примери за тоа како младинските центри можат да ги направат своите активности подостапни, поинклузивни и поприлагодени за млади со попреченост.

За проектот „Младински центри за сите“

Проектот „Младински центри за сите“ се спроведува од Центарот за младински активизам КРИК, со поддршка од Младински сојуз - Крушево, а е финансиран од Европската Унија во рамки на програмата „Посилни гласови за подобри избори - Младински хаб за Западен Балкан и Турција“.

Целта на проектот е да ги зајакне младинските центри како инклузивни и пристапни простори за сите млади, со посебен фокус на младите со попреченост. Проектот вклучува мапирање на потребите, развој на инклузивна програма, обука на младински работници и активности за застапување и подигнување на јавната свест.

За инклузивната програма

Инклузивната програма треба да служи како практичен водич за младинските центри и младинските работници за планирање, адаптација и реализација на активности во кои активно ќе можат да се вклучат млади со попреченост.

Програмата треба да опфати теми како:

• адаптација на физички и дигитални простори за поголема пристапност;

• инклузивна комуникација и користење едноставен и разбирлив јазик;

• партиципативни пристапи кои го вреднуваат гласот на младите со попреченост;

• методи за мапирање на потребите во локалната заедница;

• препознавање на бариери за учество;

• адаптација на младински активности според различни потреби;

• соработка помеѓу младински центри, дневни центри, организации и локални институции;

• примери, шаблони и алатки кои младинските работници ќе можат директно да ги користат во секојдневната работа.

Дополнително, програмата треба да биде практична, разбирлива и применлива во различни локални контексти. Таа треба да им помогне на младинските работници да идентификуваат бариери, да креираат решенија и да развиваат активности кои се прилагодени на реалните потреби на младите во нивните заедници.

По финализирањето, програмата ќе биде споделена со младинските центри вклучени во проектот, но и пошироко на национално ниво, со цел да може да се користи од младински центри и младински работници низ Северна Македонија.

Улога на консултантот/ката

Избраниот консултант/ка или тим на консултанти/ки ќе биде одговорен/на за:

• преглед на наодите од мапирањето на потребите;

• подготовка на структура и методологија за инклузивната програма;

• развој на практична програма/водич за младински центри и младински работници;

• подготовка на алатки, шаблони и работни материјали;

• вклучување теми поврзани со пристапност, инклузивна комуникација, партиципација и локално мапирање;

• координација со тимот на КРИК;

• финализирање на програмата врз основа на добиени коментари и препораки.

Очекувани резултати од ангажманот

Од ангажманот се очекува да бидат подготвени:

• финална инклузивна програма за младински центри и младински работници;

• практични алатки и шаблони за секојдневна примена;

• насоки за адаптација на младински активности;

• препораки за соработка меѓу младинските центри и дневните центри;

• краток финален извештај за процесот на подготовка.

✅ Потребни квалификации

Кандидатите треба да поседуваат:

• искуство во развој на програми, прирачници, водичи или методологии;

• искуство во младинска работа и/или неформално образование;

• искуство или добро познавање на работа со лица со попреченост;

• познавање на инклузивни и партиципативни пристапи;

• разбирање на потребите на младинските центри и младинските работници;

• способност за подготовка на практични, јасни и применливи материјали;

• искуство во работа со граѓански организации, социјални услуги или локални институции ќе се смета за предност.

Надоместок

За реализација на ангажманот е предвиден хонорар согласно проектниот буџет и договорот со избраниот консултант/ка или тим на консултанти/ки.

Надоместокот ја опфаќа подготовката на програмата, развојот на алатки и шаблони, консултациите со проектниот тим и финализирањето на документот.

Начин на аплицирање

Заинтересираните кандидат(к)и треба да испратат апликација најдоцна до 1 јуни, 2026 до employmentkrik@gmail.com, со назнака: Апликација – Консултант/ка за инклузивна програма

Апликацијата треба да содржи:

• кратка биографија / CV;

• краток предлог за методологија за подготовка на инклузивната програма;

• финансиска понуда;

• пример од претходно изработен сличен документ, доколку кандидатот/ката има таков.

Процес на селекција

Апликациите ќе бидат разгледани од селекциска комисија составена од претставници на КРИК.

Кандидатите ќе се оценуваат врз основа на:

• релевантно образование и искуство;

• претходно искуство во развој на програми, методологии или практични алатки;

• познавање на младинска работа и инклузија;

• искуство во работа со лица со попреченост;

• квалитет и применливост на предложената методологија;

• финансиска понуда.

По потреба, кандидатите може да бидат поканети на кратко интервју.

Доколку сакате да придонесете кон развој на младински центри кои се пристапни, инклузивни и отворени за сите млади, ве охрабруваме да се пријавите.

Ве очекуваме!

Центар за младински активизам КРИК