Отворен повик за учесници на обука за младински работници/чки!

Центарот за младински активизам КРИК објавува повик за учество на тридневна обука за младински работници, во рамки на проектот „Младински центри за сите“.

Обуката е наменета за младински работници/чки кои работат во младински центри од следните 5 плански региони (Источен, Југозападен, Пелагониски, Југоисточен и Полошки регион) или работат во младински организации и сакаат да ги зајакнат своите знаења и вештини за вклучување на млади со попреченост во редовните младински активности.

Доколку работите со млади, спроведувате активности во младински центар и сакате вашиот центар да стане поотворен, попристапен и поинклузивен простор за сите млади,  ве охрабруваме да се пријавите.

🌍 За проектот „Младински центри за сите“

Проектот „Младински центри за сите“ се спроведува од Центарот за младински активизам КРИК, со поддршка од Младински сојуз - Крушево, а е финансиран од Европската Унија во рамки на програмата „Посилни гласови за подобри избори - Младински хаб за Западен Балкан и Турција“.

Целта на проектот е да ги зајакне младинските центри како инклузивни и пристапни простори за сите млади, со посебен фокус на младите со попреченост. Проектот опфаќа мапирање на потребите, развој на инклузивна програма, обука на младински работници и активности за застапување и подигнување на јавната свест.

Проектот е насочен кон зајакнување на капацитетите на младинските центри и младинските работници, како и кон поголемо учество на млади со и без попреченост во активности за личен и социјален развој.

📚 За обуката

Обуката ќе се одржи во Охрид, во времетраење од три дена, од 15-17 јули, со учество на 12 младински работници од младинските центри опфатени со проектот.

Фокусот на обуката ќе биде ставен на:

• разбирање на инклузивната младинска работа;

• работа со млади со различни типови попреченост;

• инклузивна комуникација и користење едноставен јазик;

• адаптација на младински активности;

• работа со мешани групи -  млади со и без попреченост;

• градење доверба и поддржувачка групна динамика;

• соработка со дневни центри, организации и локални институции;

• подготовка на локален акциски план за поинклузивен младински центар.

Обуката ќе биде интерактивна и практична, со вежби, групна работа, симулации, студии на случај и размена на искуства. Дел од обуката ќе вклучи и практична активност со лица со попреченост, преку која учесниците ќе имаат можност да го применат наученото.

👥 Кој може да се пријави?

Повикот е наменет за:

• младински работници/чки од младински центри опфатени со проектот;

• лица кои директно планираат и реализираат активности со млади;

• лица кои имаат интерес да работат на инклузија на млади со попреченост;

• лица кои сакаат да развијат практични алатки за адаптација на активности во својот младински центар.

Предност ќе имаат кандидати кои се активни во младински центар и кои по завршување на обуката ќе можат да ги применат стекнатите знаења во својата локална заедница.

✅ Што добиваат учесниците?

Учесниците ќе имаат можност да:

• стекнат практични знаења за инклузивна младинска работа;

• научат како да адаптираат активности за млади со различни потреби;

• добијат конкретни алатки и примери за работа;

• разменат искуства со други младински работници;

• подготват локален акциски план за својот младински центар;

• учествуваат во практична активност со лица со попреченост;

• добијат сертификат за учество.

🧩 Обврски на избраните учесници

Од избраните учесници се очекува:

• активно да учествуваат во сите три дена од обуката;

• да бидат отворени за работа во група и размена на искуства;

• да подготват краток локален акциски план за својот младински центар;

• по обуката да споделат како наученото може да се примени во нивната работа.

💶 Трошоци

Учеството на обуката е бесплатно.

Трошоците за сместување, храна и работни материјали ќе бидат покриени во рамки на проектот.

📩 Начин на аплицирање

Заинтересираните кандидат(к)и треба да испратат апликација најдоцна до 8 јули со пополнување на овој формулар: https://shorturl.at/QJorn 

📝 Процес на селекција

Апликациите ќе бидат разгледани од тимот на КРИК.

При селекцијата ќе се земе предвид:

• поврзаност со младински центар опфатен со проектот;

• мотивација за учество;

• можност за примена на стекнатите знаења во локалниот младински центар;

• застапеност на различни региони и младински центри.

Избраните учесници ќе бидат известени по е-маил.

Доколку сакате да придонесете вашиот младински центар да стане место каде секој млад човек може да се чувствува добредојдено, вреднувано и вклучено – оваа обука е за вас.

Ве очекуваме! 💙

Центар за младински активизам КРИК

Проект: „Младински центри за сите“